ഭിന്നശേഷി സൗഹൃദ തിരഞ്ഞെടുപ്പ്: പ്രത്യേക യോഗം വിളിച്ച് മുഖ്യ തിരഞ്ഞെടുപ്പ് ഓഫിസർ
തിരുവനന്തപുരം: ശാരീരികമോ മറ്റു തടസ്സങ്ങളോ കാരണം യോഗ്യരായ ഒരു വോട്ടറുടെയും വോട്ടവകാശം നഷ്ടപ്പെടുന്നില്ലെന്ന് ഉറപ്പാക്കുന്നതിനായി മുഖ്യ തിരഞ്ഞെടുപ്പ് ഓഫിസർ രത്തൻ യു. ഖേൽക്കർ പ്രത്യേക യോഗം (സ്റ്റേറ്റ് സ്റ്റിയറിംഗ് കമ്മിറ്റി ഓൺ ആക്‌സസിബിൾ ഇലക്ഷൻ) വിളിച്ചുചേർത്തു. തദ്ദേശ, നിയമസഭാ തിരഞ്ഞെടുപ്പുകൾ ആസന്നമായിരിക്കെയാണ് തിരഞ്ഞെടുപ്പ് കമ്മിഷന്റെ നടപടി.
മുഖ്യ തിരഞ്ഞെടുപ്പ് ഓഫിസറുടെ (സിഇഒ) അധ്യക്ഷതയിൽ ചേർന്ന യോഗത്തിൽ, സംസ്ഥാന ഭിന്നശേഷി കമ്മിഷണർ, സാമൂഹിക നീതി വകുപ്പ്, പൊതുമരാമത്ത് വകുപ്പ്, വിവിധ സർക്കാർ സ്ഥാപനങ്ങൾ എന്നിവിടങ്ങളിലെ പ്രതിനിധികൾ, ഭിന്നശേഷി സംഘടനകളുടെ പ്രതിനിധികൾ തുടങ്ങിയവർ പങ്കെടുത്തു.
ഭിന്നശേഷി സൗഹൃദമായ സമ്മതിദാനാവകാശം രേഖപ്പെടുത്തൽ എന്ന ആശയത്തെ ആസ്പദമാക്കി ഏകദിന വർക്ക്‌ഷോപ്പ് സംഘടിപ്പിക്കുന്നതിനുള്ള സാധ്യതകൾ, ആശയങ്ങൾ, നിർദ്ദേശങ്ങൾ എന്നിവ യോഗത്തിൽ ചർച്ച ചെയ്തു.
പ്രാദേശിക തലത്തിലുള്ള വർക്ക്‌ഷോപ്പുകളുടെ നടത്തിപ്പ്, ബോധവൽക്കരണ കാമ്പെയ്നുകൾ, ദൃശ്യമായി വ്യക്തമല്ലാത്ത വൈകല്യങ്ങൾ (ബൗദ്ധിക വൈകല്യങ്ങൾ, വികാസ വൈകല്യങ്ങൾ) ഉൾപ്പെടുത്തൽ എന്നിവ നിർദ്ദേശിക്കപ്പെട്ടു.
വർക്ക്‌ഷോപ്പിൽ മുഖ്യ തിരഞ്ഞെടുപ്പ് ഓഫീസറുടെ കാര്യാലയം, ജില്ലാ കളക്ടർമാർ, സ്പെഷ്യൽ സ്‌കൂളുകൾ, വീൽചെയർ ഉപയോക്താക്കളെ പ്രതിനിധീകരിക്കുന്ന അടിസ്ഥാന തലത്തിലുള്ള സംഘടനകൾ എന്നിവയുടെ സജീവ പങ്കാളിത്തം ഉറപ്പുവരുത്തണം.
ബൂത്ത് ലെവൽ ഓഫീസർമാർ (BLOs) ഉൾപ്പെടെയുള്ള തിരഞ്ഞെടുപ്പ് ഉദ്യോഗസ്ഥർക്കായി, തെരഞ്ഞെടുപ്പുകളുടെ ആക്സസിബിലിറ്റി ഉറപ്പാക്കാൻ ആവശ്യമായതും സംവേദനാത്മകവുമായ പരിശീലന പരിപാടികൾ ക്രമീകരിക്കും.
വർക്ക്‌ഷോപ്പിൽ ചർച്ച ചെയ്യേണ്ട വിഷയങ്ങൾ ക്രോഡീകരിക്കുന്നതിനായി ഒരു സബ് കമ്മിറ്റി രൂപീകരിക്കാനും കമ്മിറ്റിയുടെ നിർദ്ദേശങ്ങൾ വിശകലനം ചെയ്യാൻ ഓൺലൈനായി ഈ ആഴ്ച യോഗം ചേരും.
