കോഴിക്കോട്: ഭിന്നശേഷിക്കാരും ചലനശേഷി കുറഞ്ഞവർക്കും ട്രെയിൻ യാത്ര ഇനി കൂടുതൽ എളുപ്പം. പ്രയാസമില്ലാതെ ട്രെയിനിൽ കയറുന്നതിനായി മൊബൈൽ റാമ്പും പ്രത്യേകം രൂപകല്പന ചെയ്ത വീൽചെയറും തയ്യാർ.
പാലക്കാട് ഡിവിഷന്റെ കീഴിലുള്ള 20 പ്രധാന സ്റ്റേഷനുകളിലാണ് ‘സുഗമ്യ’ പദ്ധതിയൊരുങ്ങുന്നത്. സ്വർഗ ഫൗണ്ടേഷന്റെ പിന്തുണയോടെ ഇന്റർനാഷണൽ ജെമോളജിക്കൽ ഇൻസ്റ്റിറ്റിയൂട്ട് (ഇന്ത്യ) യുമായി സഹകരിച്ച് നടപ്പിലാക്കുന്ന സംരംഭം പാലക്കാട് ഡിവിഷണൽ റെയിൽവേ മാനേജർ അരുൺ കുമാർ ചതുർവേദി ഉദ്ഘാടനം ചെയ്തു.
24 ലൈറ്റ്‌ വെയ്റ്റ് മൊബൈൽ റാമ്പുകളും പ്രത്യേകം രൂപകൽപ്പന ചെയ്ത 24 വീൽചെയറുകളുമാണ് തയ്യാറായിട്ടുള്ളത്. കോച്ചുകളിൽ നിന്ന് സുഗമമായി കയറാനും ഇറങ്ങാനും ഈ മൊബൈൽ റാമ്പുകൾ സഹായിക്കും.
ഇഷ്ടാനുസൃത വീൽചെയറുകളിൽ സ്റ്റേഷൻ പരിസരത്തും ട്രെയിനുകൾക്കുള്ളിലും സുരക്ഷിതമായും സുഗമമായും സഞ്ചരിക്കാം.
ഭിന്നശേഷിക്കാരായ യാത്രക്കാർക്കുള്ള അടിസ്ഥാന സൗകര്യങ്ങളും സേവനങ്ങളും മെച്ചപ്പെടുത്തുന്നതിന് പാലക്കാട് ഡിവിഷന്റെ കീഴിലുള്ള സ്റ്റേഷനുകളിൽ ലിഫ്റ്റുകൾ, റാമ്പുകൾ, ആക്സസ് ചെയ്യാവുന്ന ടോയ്ലറ്റുകൾ, വീൽചെയർ സേവനങ്ങൾ ഇതിനകം ലഭ്യമാണ്.
സംവിധാനങ്ങൾ ഇവിടെ
പാലക്കാട് ജംഗ്ഷൻ
നിലമ്പൂർ റോഡ്
പൊള്ളാച്ചി ജംഗ്ഷൻ
ഫറോക്ക്
വടകര
താനൂർ
കാസർഗോഡ്
കാഞ്ഞങ്ങാട്
പയ്യന്നൂർ
തലശ്ശേരി
ഷൊർണൂർ ജംഗ്ഷൻ
ഒറ്റപ്പാലം
കുറ്റിപ്പുറം
പട്ടാമ്പി
മംഗളൂരു സെൻട്രൽ
മംഗളൂരു ജംഗ്ഷൻ
കോഴിക്കോട്
പരപ്പനങ്ങാടി
കണ്ണൂർ
തിരൂർ