എയ്ഡഡ് സ്‌കൂളുകളിലെ ഭിന്നശേഷി നിയമനത്തിന് സെലക്ഷൻ കമ്മിറ്റി
ന്യൂഡൽഹി: കേരളത്തിലെ എയ്ഡഡ് സ്‌കൂളുകളിൽ ഭിന്നശേഷിക്കാര്‍ക്കായി സംവരണം ചെയ്തിരിക്കുന്ന തസ്തികളിൽ നിയമനം നടത്തുന്നതിന് സംസ്ഥാനതല സെലക്ഷൻ സമിതി രൂപവത്കരിക്കാൻ സുപ്രീം കോടതി നിർദേശം.
സംവരണം ചെയ്തിട്ടുള്ള സീറ്റുകളിൽ സമയബന്ധിതമായി നിയമനം പൂർത്തിയാക്കാൻ സർക്കാരിന് കോടതി നിർദേശം നൽകി.
ഇതോടെ സംസ്ഥാനത്തെ 4925 എയ്ഡഡ് സ്‌കൂളിലും ഭിന്നശേഷിക്കാര്‍ക്കായി സംവരണം ചെയ്തിട്ടുള്ള തസ്തികളിലെ നിയമനം സർക്കാരിന്റെ നിയന്ത്രണത്തിലേക്ക് മാറുകയാണ്.
കേരള വിദ്യാഭ്യാസചട്ടപ്രകാരം എയ്ഡഡ് സ്‌കൂളുകളിലെ നിയമനം നടത്താനുള്ള അധികാരം മാനേജ്‌മെന്റുകൾക്കാണെന്ന് സംസ്ഥാന സർക്കാർ സുപ്രീം കോടതിയിൽ ചൂണ്ടിക്കാട്ടിയിരുന്നു.
എന്നാൽ ഭിന്നശേഷിക്കാരുടെ സംവരണത്തിന് ചട്ടങ്ങളിലെ വ്യവസ്ഥകൾ നോക്കേണ്ടതില്ലെന്നും അക്കാര്യം തങ്ങൾ നോക്കിക്കൊള്ളാമെന്നും ഉത്തരവ് പുറപ്പെടുവിച്ചുകൊണ്ട് ജസ്റ്റിസുമാരായ സൂര്യ കാന്ത്, ദിപാങ്കർ ദത്ത എന്നിവർ അടങ്ങിയ ബെഞ്ച് നിരീക്ഷിച്ചു.
സംസ്ഥാനത്തെ 4925 എയ്ഡഡ് മാനേജ്‌മെന്റ് സ്‌കൂളുകളിൽ 2845 മാനേജ്‌മെന്റുകൾ മാത്രമാണ് ഭിന്നശേഷിക്കാര്‍ക്കായി സംവരണം ചെയ്തിട്ടുള്ള സീറ്റുകളുടെ വിശദാംശങ്ങൾ സർക്കാരിനും എംപ്ലോയ്മെന്റ് എക്‌ചേഞ്ചിനും കൈമാറിയിട്ടുള്ളതെന്ന് സംസ്ഥാന സർക്കാർ സുപ്രീം കോടതിയെ അറിയിച്ചു.
2845 സ്‌കൂളുകളിലായി 3023 തസ്തികകൾ ആണ് ഭിന്നശേഷിക്കാര്‍ക്കായി സംവരണം ചെയ്തിട്ടുള്ളത്. ഇതിൽ 580 തസ്തികകളിൽ മാത്രമാണ് ഭിന്നശേഷിക്കാരെ നിയമിച്ചിട്ടുള്ളത്.
അധ്യാപക ജോലിക്കായി സംസ്ഥാനത്തെ എംപ്ലോയ്മെൻറ് എക്‌ചേഞ്ചുകളിൽ 1040 പേർ മാത്രമാണ് നിലവിൽ രജിസ്റ്റർ ചെയ്തിട്ടുള്ളതെന്ന് വിദ്യാഭ്യാസവകുപ്പ് പ്രിൻസിപ്പൽ സെക്രട്ടറി റാണി ജോർജ് സുപ്രീം കോടതിയെ അറിയിച്ചു.
എന്നാൽ ഈ വിശദീകരണം തൃപ്തികരമല്ലെന്ന് കോടതി നിരീക്ഷിച്ചു. തുടർന്നാണ് സംസ്ഥാനതല സെലക്ഷൻ കമ്മിറ്റി രൂപീകരിക്കാൻ സുപ്രീം കോടതി സർക്കാരിന് നിർദേശം നൽകിയത്.
സംവരണം ചെയ്തിട്ടുള്ളവയിൽ 1501 തസ്തികകളിൽ ഭിന്നശേഷിക്കാര്‍ അല്ലാത്തവരെ മാനേജ്‌മെന്റുകൾ നിയമിച്ചു. ബാക്കിയുള്ള തസ്തികകൾ ഒഴിഞ്ഞുകിടക്കുകയാണ്. സംവരണ ചെയ്യപ്പെട്ട തസ്തികളിൽ നിയമനം ലഭിച്ച ഭിന്നശേഷിക്കാര്‍ അല്ലാത്തവരെ തത്കാലം പിരിച്ചുവിടേണ്ടെന്ന് സുപ്രീം കോടതി വ്യക്തമാക്കിയിട്ടുണ്ട്.
എന്നാൽ ഹർജിയിലെ അന്തിമതീർപ്പിന് അനുസരിച്ചാകും ഇവരുടെ നിയമനത്തിന്റെ സാധുത എന്നും സുപ്രീം കോടതി വ്യക്തമാക്കി.
സംസ്ഥാന സർക്കാരിന് വേണ്ടി സീനിയർ അഭിഭാഷകൻ ജയന്ത് മുത്തുരാജും സ്റ്റാൻഡിങ് കോൺസൽ സി.കെ. ശശിയും ഹാജരായി.
കേസിലെ വിവിധ കക്ഷികൾക്ക് വേണ്ടി സീനിയർ അഭിഭാഷകൻ വി. ചിദംബരേഷ്, അഭിഭാഷകരായ കെ. രാജീവ്, പി.എസ്. സുധീർ, റോയ് എബ്രഹാം, ഹാരിസ് ബീരാൻ, പി.എസ്. സുൽഫിക്കർ അലി, പി.എ. നൂർ മുഹമ്മദ്, ദീപക് പ്രകാശ്, സനന്ദ് രാമകൃഷ്ണൻ എന്നിവർ ഹാജരായി.
