ഭിന്നശേഷിക്കാരുടെ വാഹനങ്ങൾക്ക് നികുതിയിളവ്: വിലപരിധി 15 ലക്ഷമായി ഉയർത്തി

തിരുവനന്തപുരം: ഭിന്നശേഷിക്കാർ സ്വന്തം ആവശ്യത്തിനായി വാങ്ങുന്ന വാഹനങ്ങൾക്ക് അനുവദിച്ചിരുന്ന വാഹന നികുതി ഇളവിന്റെ പരിധി 15 ലക്ഷം രൂപയായി ഉയർത്തി സർക്കാർ. നിലവിലുണ്ടായിരുന്ന ഏഴ് ലക്ഷം രൂപയുടെ വാഹനവില പരിധിയാണ് 15 ലക്ഷം രൂപയായി വർധിപ്പിച്ചത്.

കേരള മോട്ടോർ വാഹന നികുതി നിയമം, 1976-ലെ 22-ാം വകുപ്പ് പ്രകാരം സർക്കാർ പുറപ്പെടുവിച്ച വിജ്ഞാപനത്തിലാണ് ഇളവ് പരിധി ഉയർത്തിയത്. 2026 സെപ്റ്റംബർ 19-ന് പുറത്തിറങ്ങിയ കേരള ഗസറ്റ് വിജ്ഞാപനത്തിലൂടെയാണ് (G.O.(P) No.24/2026/TRANS) ഈ ഭേദഗതി ഔദ്യോഗികമായി പ്രാബല്യത്തിൽ വന്നത്.

ഭിന്നശേഷിക്കാർ സ്വന്തം ആവശ്യത്തിനായി ഉപയോഗിക്കുന്ന മൂന്ന് ചക്ര വാഹനങ്ങൾ, invalid carriages, മോട്ടോർ സൈക്കിളുകൾ, മോട്ടോർ കാറുകൾ എന്നിവയ്ക്ക് നികുതി ഇളവ് അനുവദിച്ചുവരികയായിരുന്നു. 2016-ൽ ഈ ആനുകൂല്യത്തിന് അഞ്ച് ലക്ഷം രൂപയുടെ വാഹനവില പരിധി ഏർപ്പെടുത്തിയിരുന്നു. തുടർന്ന് 2018-ൽ ഇത് ഏഴ് ലക്ഷം രൂപയായി ഉയർത്തി.

2026-27 സാമ്പത്തിക വർഷത്തെ പുതുക്കിയ ബജറ്റ് പ്രസംഗത്തിലെ 315-ാം ഖണ്ഡികയിൽ, ഭിന്നശേഷിക്കാർക്കുള്ള വാഹന നികുതി ഇളവിന്റെ അർഹമായ വാഹനവില പരിധി ഏഴ് ലക്ഷത്തിൽ നിന്ന് 15 ലക്ഷം രൂപയായി ഉയർത്തുമെന്ന് മുഖ്യമന്ത്രി വി.ഡി. സതീശൻ പ്രഖ്യാപിച്ചിരുന്നു. ഇതിന്റെ തുടർച്ചയായാണ് ഇപ്പോൾ സർക്കാർ വിജ്ഞാപനം പുറത്തിറക്കിയത്.

പുതിയ ഭേദഗതിയിലൂടെ ഏഴ് ലക്ഷം രൂപ എന്ന പരമാവധി വാഹനവില പരിധിക്ക് പകരം 15 ലക്ഷം രൂപ എന്ന പരിധിയാണ് നിലവിൽ വരുന്നത്. വിജ്ഞാപനത്തിലെ ഭേദഗതിയിൽ “Seven Lakhs” എന്നതിന് പകരം “Fifteen Lakh” എന്ന് മാറ്റിയതായി വ്യക്തമാക്കുന്നു.

ഭിന്നശേഷിക്കാർക്ക് വാഹനമെന്നത് കൂടുതൽ പ്രാപ്യമാക്കുന്നതിനുള്ള നിർണായക ധനസഹായ നടപടിയായാണ് പുതിയ ഇളവ് പരിധി പ്രാബല്യത്തിൽ വരുന്നത്.